चीनका उच्च सैन्य बैज्ञानिकको फड्को कोरोना खोप परीक्षणमा

जानकी पोस्ट, १२ जेठ, काठमाडौँ : कोरोना भाइरसले संसारलाई हल्लाइरहेको छ। यसको खोप बनाउन संसारभरका वैज्ञानिकबीच प्रतिस्पर्धा चलिरहेको छ। भाइरसको उद्गम मुलुक चीनले पनि द्रुत गतिले काम गरिरहेको छ।

यसै प्रतिस्पर्धाको क्रममा चीनका एक उच्च सैन्य अधिकारी तथा भाइरल वैज्ञानिकले विकास गरेको सम्भावित खोपले सकारात्मक नतिजा देखाएको छ। सय जनाभन्दा बढी स्वस्थ व्यक्तिमा गरिएको प्रारम्भिक क्लिनिकल परीक्षणमा यो खोप भाइरससँग लड्ने क्षमता बढाउन सफल भएको अनुसन्धाता बाट बताइयेको छ ।

‘ल्यान्सेट’ जर्नलमा शुक्रबार प्रकाशित क्लिनिकल परीक्षण रिपोर्ट अनुसार पहिलो चरणको परीक्षण सकारात्मक र सुरक्षित रहेको छ।

चीनको एकेडेमी अफ मिलिट्री मेडिकल साइन्स तथा क्यान–सिनो बायोलोजिक्सले संयुक्त रूपमा यो सम्भावित खोप विकास गरेका हुन्। अनुसन्धान टोलीको नेतृत्व गरेका मेजर जनरल छेन वेईले भनेका छन्, ‘अहिलेसम्मको नतिजाबाट यो खोप महत्वपूर्ण कोशेढुंगा सावित हुनसक्छ।’

रिपोर्टको अनुसार यो एकचोटि मात्र दिइने खोप हो। एक डोज दिएको १४ दिनबाट कोरोना भाइरससँग लड्ने एन्टिबडी विकास हुन्छ।
क्लिनिकल परीक्षण नतिजा सावधानीपूर्वक विश्लेषण गर्नुपर्ने वैज्ञानिकहरूले औंल्याएका छन्। उनीहरूका अनुसार भाइरससँग लड्ने एन्टिबडी विकास हुँदैमा मान्छे कोभिड–१९ बाट सुरक्षित रहन्छ भन्ने ग्यारेन्टी हुँदैन। यसका लागि थप अनुसन्धान जरुरी छ। सम्भावनाको ढोका भने खुलेको उनीहरू बताउँछन्।

यसको मानवीय परीक्षण गत मार्चबाट सुरू भएको हो। वुहान सहरका १०८ जना स्वस्थ व्यक्तिमा परीक्षण गरिएको थियो। उनीहरू १८ देखि ६० वर्ष उमेरका थिए।

क्लिनिकल परीक्षण क्रममा ती स्वयंसेवकलाई थोरै, मध्यम र उच्च डोज दिइएको थियो। त्यसपछि चार सातासम्म उनीहरूको रोग प्रतिरोधक प्रणालीमा आउने परिवर्तन अनुगमन गरियो। तीमध्ये १०५ जनामा खोप लगाइएको २८ दिनभित्र कोरोनासँग लड्ने एन्डिबडी विकास भएको पाइयो। उनीहरू कसैलाई पनि गम्भीर खालको नकारात्मक असर नदेखिएको रिपोर्टमा छ।

अनुसन्धानमा सहभागी ९७ जनामा भने अर्को खालको प्रतिरोधक क्षमता पनि विकास भएको थियो, जसले २८ दिनपछि एन्टिबडीको प्रभाव हटाउने काम गर्छ।

अनुसन्धान टोली प्रमुख छेन वेईका अनुसार सहभागीमध्ये ५० जनालाई ज्वरो आएको थियो भने ४७ जनाले शारीरिक कमजोरी महशुस गरेका थिए। त्यस्तै, ४२ जनाले टाउको दुखेको र १८ जनाले जीउ दुखेको बताएका थिए।

वैज्ञानिकहरूले यो अनुसन्धानमा केही समस्या औंल्याएका छन्।