यस पालीको विवाहपञ्चमी खल्लो

जनकपुरधाम : यस क्षेत्रकै सबैभन्दा विशिष्ट र भव्य रूपमा मनाइने रामजानकी विवाहपञ्चमी महोत्सव यस वर्ष औपचारिकतामा सीमित भएको छ।

विगतमा महोत्सवको रमझम एक महिना पहिलेदेखि नै सुरु हुन्थ्यो। होटल, धर्मशाला, लज र सर्वसाधारणका घरहरू महोत्सव हेर्न आउने पाहुनाहरूले भरिभराउ हुन्थे। १५ दिनअगावै जानकी मन्दिरमा मिथिलानीहरूले मंगलगान गाउन सुरु गर्थे। तर, यस वर्ष भने सबै सुनसान छ।

मन्दिरमा पनि खासै चहलपहल छैन। महोत्सव यसवर्ष परम्परा निर्वाह गर्ने किसिमले मात्रै मनाइने भएको छ। मंसिर शुक्लपक्ष पञ्चमी तिथिका दिन लाखौं श्रद्धालुहरूको सहभागितामा प्रत्येक वर्ष रामसीता विवाहमहोत्सव मनाउने गरिन्छ। परापूर्वकालमा भगवान राम र सीताबीच गाँसिएको वैवाहिक सम्बन्धलाई हालसम्म पनि जीवन्त बनाउने यो विवाहपञ्चमी यस वर्ष पुस ४ गते परेको छ। तर, महोत्सवको तयारी भने छैन।

कोरोना महामारीले गर्दा सामान्य र परम्परा निर्वाह गर्न मात्रै विवाहपञ्चमी मनाउन लागिएको विवाहपञ्चमी महोत्सव मूल समारोह समितिका अध्यक्ष एवं जानकी मन्दिरका महन्थ रामतपेश्वर दास बताउँछन्। विवाहपञ्चमीमा हुने अति आवश्यक विधिहरू सामान्य रूपमा सम्पन्न गरिने र सीताराम वैवाहिक समारोह पनि जानकी मन्दिर भित्रै गर्ने तयारी रहेको छ। गत वर्षहरूमा वैवाहिक समारोह जानकी मन्दिरको प्रांगणमा हुने गथ्र्यो र त्यसमा सहभागी हुन लाखौं श्रद्धालु जनकपुर आउने गर्थे। महामारीको कारण सामान्य रूपमै महोत्सव मनाउने आयोजकको आग्रह अनुरूप नै यस वर्ष पर्वलाई निरन्तरता मात्र दिन लागिएको धनुषाका प्रमुख जिल्ला अधिकारी बन्धुप्रसाद बाँस्तोलाले बताए।

महोत्सवमा सहभागी हुन अधिकांश साधुसन्त भारतबाट आउने गर्थे। तर, यस वर्ष नेपाल भारत सीमा बन्द गरिएको हुँदा अतिथिलाई पनि आमन्त्रण गरिएको छैन। विगतका वर्षहरूमा भारतको अयोध्याबाट साधुसन्तहरूको टोली जन्ती बनेर जनकपुर आउथ्यो। यहाँ जानकी मन्दिरले जन्तीको भव्य स्वागत गरी रंगभूमि मैदानमा जानकीको डोला र रामको डोलाबीच स्वयंम्बर समारोह गरिन्थ्यो। सोही दिन साँझ भव्य मण्डपमा विवाह रामसीताको विवाह हुन्थ्यो।

विवाहको भोलिपल्ट रामकलेवा (जन्तीहरूको लागि विशेष भोज) को आयोजन गरेर सबै साधुसन्तलाई ससम्मान उपहारसहित बिदाइ गरेपछि महोत्सव सकिन्थ्यो।